Reydlər zamanı 25 sürücü cərimələndi - FOTO

20.04.2021 11:08
Respublika ərazisində keçirilən "Təmiz hava” aylığı çərçivəsində Cəlilabad Rayon Polis Şöbəsinin Dövlət Yol Polisi bölməsi və Ekologiya və Təbii Sərvətlər Nazirliyinin (ETSN) əməkdaşlarının birgə təşkilatçılığı ilə rayonda nəqliyyatın sıx olduğu yerlərdə reyd keçirilib.

Bu barədə REYD-ə DİN mətbuat xidmətinin Lənkəran regional qrupundan məlumat verilib.

Bildirilib ki, bu cür reydlərin keçirilməsində əsas məqsəd avtomobillərin ixrac qazlarının tərkibində olan zərərli maddələrin atmosferi çirkləndirməsinin qarşısının alınmasıdır. Bu barədə sürücülərlə bir daha məlumatlandırıcı işlər aparılıb və standartlara cavab verməyən 13 avtomobilin sürücüsü barədə inzibati qaydada tədbir görülüb.

Biləsuvarda da rayonun müxtəlif ərazilərində yol polisi və ETSN əməkdaşları tərəfindən reyd təşkil olunub. Sürücülərin bir daha diqqətinə çatdırılıb ki, istifadələrində olan avtomobillərin yanacaq sistemini tənzimləməklə onları saz vəziyyətə gətirməli və ixrac qazlarının tərkibinin normalara uyğunlaşdırılmasını təmin etdikdən sonra istismarına yol verməlidirlər. Buna əməl etməyən 12 sürücü barəsində yol polisi əməkdaşları tərəfindən inzibati protokollar tərtib edilib.